Samandar me utarta hun to ankhen bheeg jati hay, Wasi Shah, Wasi Shah Poetry,

Samandar me utarta hun to ankhen bheeg jati hay
Teri ankho ko parhta hun to ankhen bheeg jati hay,

Tumhara naam likhne ki ejazat chin gaye jab se
Koi bhi lafz likhta hun to ankhen bheeg jati hay,

Teri yadon ki khushbu khirkion me raqs karti hay
Tere gham me sulagta hun to ankhen bheeg jati hay,

Me hans k jhail leta hun judai ki sabhi rasmen
Gale jab uske lagta hun to ankhen bheeg jati hay,

Na jane ho gaya hun me is qadar hassas kab se
Kisi se baat karta hun to ankhen bheeg jati hay,

Wo sab guzre huwe lamhat mujhko yaad ate hen
Tumhare khat jo parhta hun to ankhen bheeg jati hay,

Me sara din bohut masroof rehta hun magar junhi
Qadam chokhat pe rakhta hun to ankhen bheeg jati hay,

Har ik muflis ke mathe par alam ki daastane hay
Koi chehra bhi parhta hun to ankhen bheeg jati hay,

Bare logo k onche badnuma aur sard mehlon ko
Ghareeb ankho se takta hun to ankhen bheeg jati hay,

Tere kooche se ab mera talluq wajibi sa hay
Magar jab bhi guzarta hun to ankhen bheeg jati hay,

Hazaron mosamo ki hukumrani he mere dil par
Wasi me jab bhi hansta hun to ankhen bheeg jati hay.