Mairi Zindagi Mein Yoon Aakar, Door Kyun Jaa Rahey Ho
Mujhey Gair Hi Rehney Do, Tum Apna Kyun Bana Rahey Ho,
Tabeer Mein Jin Khwabon Ki Tum Shamil Hi Nahin
Bolo Phir Aisey Khwaab Mujhey Kyun Dikha Rahey Ho,
Agar Pyar Kar Ke Aisey Hi, Hai Mujh Ko Chorrh Jaana
Bataao Phir Pyar Karna, Mujhey Kyun Sikha Rahey Ho,
Jahaan Say Umeed Bhi Kam Hai, Aur Aas Bhi Nahin Baaqi
Bolo Na Phir Uss Simat, Chaltey Kyun Jaa Rahey Ho,
Mairi Qismat Mein Nahin Ho, Tum Jaantey Bhi Ho Lekin
Phir Bhi Apney Dil Mein , Mujhe Kyun Basa Rahey Ho,
Jiss Haath Mein Na Bani Hai, Lakeer Koi Mairey Naam Ki
Phir Uss Haath Ko Mairey Haath Mein, Tum Kyun Thama Rahey Ho,
Main Pehley Bhi Utth Gaya Tha Jo Gira Tha Iss Dagar Pey
Abb Bhi Rehney Do Zameen Par, Mujhey Kyun Uttha Rahey Ho,
Iss Rastey Pey Main Kho Gaya Tha Pehley Bhi Mairey Humdum
Mujhey Dhoondney Ke Waastey Khudh Ko Kyun Ganwa Rahey Ho,
Mairi Aankhon Mein Hain Abb Aansoo, Na Kabhi Khatam Honey Waaley
Kaash Sun Letey Jab Main Kehta Tha, Itna Kyun Hansa Rahey Ho,
Mairi Chotti Si Hai Ikk Guzaarish Mairey Khuda Tu Kabool Kar Ley
Mujh Ko Bhi Tu Paas Bula Ley, Agar Tum Uss Ko Bula Rahey Ho,
No comments:
Post a Comment